প্ৰযুক্তি জগতৰ প্ৰতিষ্ঠান গূগলে মহাকাশ গৱেষণাৰ ক্ষেত্ৰত এক নতুন পদক্ষেপ গ্ৰহণ কৰিছে। প্ৰতিষ্ঠানটোৱে মহাকাশলৈ কৃতিম বুদ্ধিমত্তা বা এআই চিপ প্ৰেৰণ কৰাৰ বাবে ‘প্ৰজেক্ট ছানকেচাৰ’ শীৰ্ষক এক অৰ্বিটেল ডাটা চেণ্টাৰ প্ৰকল্প হাতত লৈছে। উপলব্ধ তথ্য অনুসৰি আগন্তুক ১ অক্টোবৰত এই গুৰুত্বপূৰ্ণ অভিযানটো সম্পন্ন কৰাৰ পৰিকল্পনা কৰা হৈছে। এই পৰীক্ষামূলক প্ৰকল্পৰ জৰিয়তে মহাকাশৰ কক্ষপথত উন্নত প্ৰযুক্তিৰ এআই চিপৰ কাৰ্যকাৰিতা পৰীক্ষা কৰা হ’ব। প্ৰযুক্তিগত উন্নতি আৰু মহাকাশ ভিত্তিক তথ্য প্ৰক্ৰিয়াকৰণৰ ক্ষেত্ৰত এই পদক্ষেপে গুৰুত্বপূৰ্ণ ভূমিকা পালন কৰিব বুলি আশা কৰা হৈছে। গৱেষক আৰু প্ৰযুক্তিবিদসকলে এই নতুন অভিযানৰ সফলতাক লৈ আশাবাদী হৈ পৰিছে।